Guru Kami nang Mulia

Guru Kami nang Mulia

Lawan bismillah kami bamula

Handak bakisah lawan sadikit rangkaian kata

Mangisahakan guru kami nang tacinta

Guru _ _ _ _ _ _ _ _ ngarannya

Duhai guru kami nang mulia

Nang kada suah malihat kami sabalah mata

Sabarataan murid di mata pian sama

Ngitu pang pian nang sabujurannya

Pian nang tarus mambimbing kami

Pian jua nang tarus mamadahi

Kada aasaan managur lawan kami

Dasar pian paguruan nang kami sayangi

Banyak sudah ilmu nang pian lajarakan

Kada haja ilmu ahirat tapi jua ilmu kaduniaan

Pian handak kami lurus sabarataan

Hidup di dunia nyaman lawan mati baiman

Di mana haja pian kami tarus mangganang

Kami sudah maanggap pian kaya kuwitan saurang

Pian jua sudah maanggap kami nang kaya anak saurang

Mun kadada pian tarasa ada nang kurang

Kami dandaman lawan pian nang katuju bagaya

Nang masi mahibur kami bila kami tajarat panah asmara

Pian paling paham mun kami lagi baduka

Ngitu nang maulah kami samakin suka

Dasar pang pian pahlawan nang kada kawa didustai

Nang malajari tulus mulai lubuk hati

Kada biasa muyak hampai kami mangarti

Mun kami kada bisa pian hakun haja maulangi

Ibarat matahari pian tarus manyinari

Insya allah ilmu pian kami gawi satiap hari

Lawan ngaran pian tarus kami tulis di dalam hati

Kada bataha luntur biar hari tarus baganti

Ngaran pian kada pang tasiar nang kaya artis di dunia maya

Kami tahu pian lain urang nang cinta dunia

Hidup pian saadanya tapi tarus bahagia

Karana pian hidup gasan ibadah kapada-nya

Kami baharap guru tarus mandu’akan kami

Supaya kami taqwa lawan ilahi

Tarus istiqamah maamalakan ilmu nang pian lajari

Mudah-mudahan kami dapat ridha ilahi

Kaya ngini pang jalan karana kita sudah tapisahan

Kita saling mandu’akan dalam kabaikan

Mudah-mudahan takumpul di surga sabarataan

Jangan hampai ada nang katinggalan